شوية طواجن مفيش أجدع من كده للناس الأكيييلة

                           طاجن البامية باللحمة.. الأكلة اللي ريحتها بتعِبّي البيت دفء وحنيّة 

لو نفسك في أكلة مصرية أصيلة على أصولها، طاجن البامية باللحمة هو الاختيار الصح 

طعم غني، ريحة تجنن، وسهلة جدًا في التحضير 

المكونات:

نص كيلو لحمة ضاني (مقطعة مكعبات)

نص كيلو طماطم معصورة

نص كيلو بامية مغسولة ومقطعة

2 بصلة كبار مفرومين

3 فصوص توم مفرومين

ملعقة صلصة طماطم

ملعقة صغيرة كمون

ملعقة صغيرة كزبرة ناشفة

ملعقة صغيرة فلفل أسود

رشة ملح حسب الرغبة

قرن فلفل شطة (اختياري)

4 أكواب شوربة أو مية

3 ملاعق زيت نباتي

الطريقة:

في حلة على النار، سخّني الزيت ونزّلي البصل لحد ما يصفرّ شوية.

زوّدي اللحمة وقلّبيها لحد ما تتحمّر من كل الجوانب.

ضيفي التوم والكمون والكزبرة والفلفل والملح والشطة، وقلّبي دقيقة كده.

بعد كده نزّلي صلصة الطماطم والطماطم المعصورة، وقلّبي لحد ما تتسبّك حلو.

زوّدي الشوربة، وسيبيها تغلي شوية.

بعد كده حطي الخليط في طاجن، وضيفي البامية، وادخليه فرن سخن على 180 درجة حوالي نص ساعة، لحد ما اللحمة تستوي والبامية تاخد وشّ جميل 

قدّميها سخنة مع رز أبيض أو عيش بلدي، وهتحسي إنك في قلب المطبخ المصري الأصيل 

شاركوا الوصفة مع أصحابكم اللي بيحبوا الأكلات المصرية الجدعان

لو نفسك في أكلة دسمة وريحة تشهي البيت كله، جربي الريش الضاني دي، طريقة سهلة وطعمها تحفة 

هتخلي سفرتك في العيد حاجة تانية خالص 

المكونات:

كيلو ريش ضاني

بصلة مقطعة جوانح

كوب بطاطس مكعبات

رأس ثوم مبشور

عصير ليمون

ربع كوب خل

ملح وفلفل أسود

3 ملاعق زيت زيتون

تتبيلة الريش:

معلقة ثوم مفروم

بصلة مفرومة

معلقة صلصة طماطم

ربع كوب عصير ليمون

ربع كوب خل

ربع كوب زيت زيتون

معلقة دبس رمان

معلقة صغيرة روزماري

الطريقة:

اغسلي الريش بالملح والمية كويس، وصفيها تمامًا.

في بولة كبيرة، اخلطي كل مكونات التتبيلة مع بعض.

غمّسي الريش في التتبيلة، وغطّيها، وسيبيها في التلاجة ليلة كاملة تتشرب الطعم.

سخّني طاسة فيها نقطة زيت وشوّحي الريش لحد ما تاخد لون دهبي جميل

في صينية فرن، حطي البطاطس والبصل والثوم، ورشة ملح وفلفل، وعصير ليمون، وزيت زيتون، وقلّبيهم كويس.

رصي الريش فوق الخضار، وضيفي نص كوب مية دافية.

غطيها بورق فويل، وادخليها فرن سخن على 200 درجة لمدة ساعة.

شيلي الفويل، وحمّريها شوية تحت الشواية لحد ما تاخد لون يشهي 

قدّميها سخنة مع طبق فتة أو رز أبيض، وهتسمعي كلمة "الله!" من أول لقمة 

شاركوا الوصفة دي مع أصحابكم اللي بيحبوا الأكلات الدسمة والريحة الحلوة بتاعة العيد

النهارده هنعمل مع بعض طاجن الكوارع على أصوله، بطريقتين للي بيحبوا النعناع والطماطم أو الفتة التقليدية اللي بتشهي 

ريحة الطاجن ده وهو في الفرن بتخلي الشارع كله يجوع 

أولًا: فتة الكوارع (المقادير)

12 قطعة كوارع (أقدام ضاني)

بصلتين كبار

5 ورق لورا + 10 فصوص حبهان + عودين قرفة

ملح وفلفل حب

2 معلقة سمن

3 أرغفة عيش مقلي

2 كوب رز + 3 كوب ميه

6 فصوص توم مهروس

عصير لمونة

4 كوب زبادي

4 معالق طحينة

معلقة نعناع ناشف

صنوبر محمّر بالزبدة (للتقديم)

الطريقة:

شيّ الكوارع على النار عشان تشيلي أي وبر، واغسليها كويس جدًا بالملح والدقيق.

اسلقيها في ميه نظيفة مع البصل، والبهارات، والملح، لحد ما تستوي واللحم يفصل من العضم.

في طاسة حطي معلقة سمن وشوّحي الكوارع لحد ما تتحمّر شوية، وضيفي شوية من الشوربة عليها.

اعملي الرز بالسمن والملح وخليه مفلفل وجميل.

حضّري الدقة: اخلطي الزبادي + الطحينة + الثوم + عصير الليمون + النعناع + الملح كويس.

جهّزي طبق التقديم:

عيش مقلي

عليه شوية شوربة سخنة

فوقه الرز

فوقه صوص الزبادي

وأخيرًا الكوارع المحمّرة

وزيّني بالصنوبر والزبدة 

ثانيًا: طاجن الكوارع بصوص الطماطم والنعناع:

كوارع مسلوقة

كوب بصل + نص كوب مفروم

نص كوب جزر + نص كوب كرفس

كوب بندورة

بقدونس + حبهان + سبع بهارات + كزبرة ناشفة + رشة جوزة الطيب + 3 معالق سمنة + 3 معالق نعناع ناشف

ملح وفلفل حسب الرغبة

التحضير:

في حلة، شوّحي البصل والجزر والكرفس والبقدونس في السمنة.

ضيفي الكوارع المسلوقة والطماطم والبيوريه وكمية من الميه السخنة.

تبّلي بالبهارات، والملح، والفلفل، والنعناع الناشف، واسيبيها تغلي على نار هادية حوالي ساعة ونص.

لما الصوص يتقل، حطي الخليط في طاجن فخار وادخليه الفرن ربع ساعة ياخد لون دهبي وريحه تجنن 

الطاجن ده بيتاكل بسكوتة عيش بلدي سخن، واللي يشوفه يقول “ده مش أكل ده تحفة فنية!” 

شاركوا الوصفة مع أصحابكم اللي بيحبوا الأكل الدسم والمزاج العالي 

هيشكروك بعد أول لقمة 

                             طاجن تورلي باللحمة.. أحلى طاجن خضار بلحمة على أصول المطبخ المصري

الأكلة دي بتجمع بين طعم الخضار الجميل ونكهة اللحمة اللي بتدوب في الفم 

ريحة الفرن لوحدها كفيلة تخلي البيت كله يجري على السفرة 

المكونات (تكفي 4 أفراد):

كمية لحمة مسلوقة حسب الرغبة

خضار مشكل (كوسة، بطاطس، بسلة، فاصوليا خضراء، طماطم، بصل)

2 معلقة صلصة طماطم

شوربة اللحمة المسلوقة

ملح حسب الرغبة

فلفل أسود

بهارات مشكلة

مرقة لحم أو دجاج (اختياري)

شوية زيت

الطريقة:

في حلة ع النار، حطي شوية زيت وشوّحي البصل لحد ما يدبل.

ضيفي الخضار

ضيفي الصلصة والطماطم المقطعة والبهارات، وقلّبي كويس.

ضيفي قطع اللحمة وشوربة اللحمة السخنة، وسيبيه يغلي حوالي ربع ساعة.

بعد كده، حطي الخليط في طاجن فخار أو بيركس، وغلّفيه بورق فويل

دخليه فرن سخن على درجة 180 لمدة نص ساعة، وبعدها شيلي الفويل وخليه ياخد لون جميل تحت الشواية.

قدّميه سخن جنب رز أبيض أو عيش بلدي، وهتحسي إنك بتاكلي أكلة بلدي من الزمن الجميل 

شاركوا الوصفة مع أصحابكم اللي بيحبوا الأكل المصري الأصيل 

قولولهم يجربوا طاجن التورلي باللحمة وهيدعولكم