الملف ده كنـــــز حقيقي للمخبوزات لازم تحفظيه عندك

المكونات:

4 أكواب دقيق

½ كوب سكر

1 ملعقة كبيرة ملح (مش مليانة)

1 ملعقة كبيرة خميرة فورية (وممكن تزود حسب الجو)

1 ملعقة كبيرة زيت

ماء للعجن (حسب احتياج العجينة)

 

الطريقة الأساسية:

نخلط الدقيق + السكر + الملح + الخميرة كويس.

نبدأ نضيف المياه تدريجيًا لحد ما تتكون عجينة

لا طرية زيادة ولا ناشفة

(ولو ناشفة شوية أحسن للي عندهم عجان).

أهم خطوة 

خدم العجين كويس جدًا

يعني نعجن لحد ما العجينة تبقى ناعمة وملساء.

ممكن قبل ما نخلص العجن نحط ملعقة زيت ونكمل عجن

وممكن نسيبها عادي برضه.

تشكيل العيش الفينو:

نطلع العجينة ونبدأ نشرح العيش.

نعمل قطعة كبيرة ونقطعها زي الصورة.

نفرد كل قطعة ونلفها رول

ونرصها في الصاج.

ممكن نغمس الرغيف في سمسم أو نسيبه سادة.

نسيب العيش يخمر،

نشغل الفرن على 280°

وندخله لحد ما يستوي ويحمر.

الكيزر:

نقطع العجينة

نلفها كور

نرش سمسم على الوش

نسيبها تخمر

تدخل فرن على 240°

القرص بالقرفة:

نقطع العجينة ونفرد كل قطعة فردة صغيرة بالإيد.

نحشي قرفة + سكر

ونقفل بهدوء ونلفها زي الكيزر.

نسيب القرص ترتاح شوية.

شغل المحلات بقى:

نجهز خليط سمسم + سكر + شوية زيت

ندوس وش القرص في الخليط

نرص في الصاج مع الضغط الخفيف علشان تفرد.

نسيبها تخمر كويس

وندخلها مع الكيزر

(علشان حرارتهم واحدة).

تدخل الفرن من 12 لـ 15 دقيقة.

فينو طري – كيزر مظبوط – قرص قرفة زي الأفران

شغل بيوت وأفران

وبالهنا والشفا 

                                                 القرص بالعجوة الهشة وطعم زمان 

المكونات:

العجين:

4 أكواب دقيق

1 كوب حليب دافئ

1 ملعقة كبيرة خميرة فورية

1 ملعقة صغيرة فانيليا

2 ملعقة كبيرة سمسم

2 ملعقة كبيرة سكر

½ كوب سمنة

1 ملعقة صغيرة ملح

الحشو:

¼ كيلو تمر

1 ملعقة كبيرة سمنة

1 ملعقة كبيرة قرفة ناعمة

1 ملعقة كبيرة سمسم

القرفة والسمسم بيفرقوا جدًا في الطعم

الطريقة:

في بولة، اخلطي كل المكونات الجافة (الدقيق، الخميرة، السكر، الملح، الفانيليا، السمسم).

أضيفي السمنة واعملي فرك كويس لحد ما الدقيق يتغلف بالسمنة بالكامل.

أضيفي الحليب الدافئ واعجني كويس حوالي 5 دقائق.

لو العجينة محتاجة سوائل، ضيفي ¼ كوب ماء دافئ بالتدريج.

(ممكن تضيفي ملعقة كبيرة قشطة لو متوفرة)

شكلي العجينة كور متوسطة الحجم، غطيها

وسيبيها ترتاح 10 دقائق قبل التشكيل.

حضري الحشو بخلط العجوة + السمنة + القرفة + السمسم،

وشكليها كور صغيرة.

افردي كل كرة عجين فردة خفيفة، احشيها بكرة عجوة

واقفليها كويس، ورصيها في الصينية.

سيبي القرص ترتاح 15 دقيقة قبل الخَبز.

دخليها فرن ساخن مسبقًا على حرارة متوسطة في الرف الأوسط

لحد ما تتحمر من تحت.

ممكن تشغلي الشواية دقيقة خفيفة علشان الوش ياخد لون جميل.

قرص هشة ومليانة طعم وتفك من الإيد

أحلى حاجة مع الشاي

وبألف هنا وشفا 

                                                 بان كيك طري وناجح من أول مرة 

المقادير:

1½ كوب دقيق متعدد الاستخدامات

2 ملعقة صغيرة سكر

2 ملعقة صغيرة بيكنج بودر

¼ ملعقة صغيرة بيكنج صودا (كربونات)

¼ ملعقة صغيرة ملح

1 ملعقة صغيرة فانيليا

1 كوب حليب دافئ

2 بيضة كبيرة

¼ كوب زبدة مذابة

 

طريقة التحضير:

في بولة كبيرة، انخلي الدقيق + البيكنج بودر + البيكنج صودا + السكر + الملح + الفانيليا وقلبيهم كويس.

في بولة تانية، اخفقي البيض لحد ما ينفش،

ضيفي الحليب الدافئ + الزبدة المذابة واخفقي كويس.

أضيفي خليط الدقيق على خليط السوائل

واخفقي بخفة لحد ما الخليط يبقى متماسك ومش سايل قوي.

سخني طاسة تيفال على نار متوسطة

وادهيها بنقطتين زيت أو زبدة.

خدي مغرفة صغيرة من الخليط

ونزليها

وطي النار خالص،

وأول ما الوش يطلع فقاقيع واللون يبقى دهبي

اقليبيه على الناحية التانية لحد ما يحمر.

ملاحظة مهمة:

بين كل بان كيك والتانية

امسحي الطاسة بفوطة

وادهيها بنقطتين زيت أو زبدة.

بان كيك طري وخفيف وطعمه يجنن

يتقدم مع العسل أو النوتيلا

والفواكه الطازة

                                                   بسكوت بالبرتقال أو بالحليب سهل وسايح 

المقادير:

3 كوب دقيق

1 كوب سكر بودرة

3 بيضات

1 كوب زبدة طرية أو سمنة

1 ملعقة صغيرة بيكنج بودر

فانيليا

رشة ملح

بشر برتقال أو جوز هند (اختياري)

¼ كوب عصير برتقال أو حليب

 

الطريقة:

في بولة، اخفقي الزبدة أو السمنة بالمضرب لحد ما تبقى طرية.

ضيفي السكر البودرة واخفقي بالمضرب الكهربائي حوالي دقيقتين لحد ما الخليط يبقى كريمي وفاتح اللون.

أضيفي البيض واحدة واحدة مع الخفق، ثم الفانيليا وبشر البرتقال.

ضيفي عصير البرتقال أو الحليب واخلطي كويس.

في بولة تانية، اخلطي الدقيق + البيكنج بودر + رشة الملح.

ضيفيهم تدريجيًا على الخليط مع التقليب لحد ما تتكون عجينة ناعمة ومتجانسة.

حطي العجينة في كيس حلواني أو ماكينة بسكوت، وشكليها في صينية مبطنة بورق زبدة.

دخلي الصينية فرن ساخن مسبقًا على 170° لمدة 10–15 دقيقة

لحد ما البسكوت ياخد لون دهبي خفيف.

بسكوت ناعم وسايح وطعمه يجنن

ينفع مع الشاي أو القهوة

                                                    ترسة الأفران بالتمر زي المحلات 

المكونات:

العجين:

½ كيلو دقيق

رشة ملح

1 ملعقة كبيرة خميرة فورية

3 ملاعق كبيرة سكر

3 ملاعق كبيرة لبن بودرة (اختياري)

¼ كوب زيت

1 ملعقة كبيرة خل أبيض

1¼ كوب ماء دافئ

حشوة

تمر مفروم جاهز

رشة قرفة

سمسم

1 ملعقة كبيرة سمنة

طريقة التحضير:

في بولة كبيرة، اخلطي الدقيق + الخميرة + السكر + اللبن البودرة + الملح.

ضيفي الزيت + الخل + الماء تدريجيًا واعجني كويس جدًا لحد ما تحصلي على عجينة ناعمة ومطاطية.

غطي العجينة وسيبيها تخمر ساعة كاملة لحد ما يتضاعف حجمها.

حضري الحشوة بخلط التمر المفروم + السمنة + القرفة + السمسم كويس.

خدي قطعة من العجينة، وافرديها شكل بيضاوي.

حطي شوية من حشوة التمر على طرف العجينة.

لفي العجينة رول واقفليها على شكل دائرة.

اعملي فتحات خفيفة في جوانب الدائرة بالسكينة.

رصي الترسة في صينية مبطنة بورق زبدة، وغطيها

وسيبيها ترتاح 30 دقيقة.

ادهني الوش ببيض مخفوق ورشي سمسم.

دخليها فرن ساخن مسبقًا على حرارة عالية في الرف الأوسط لمدة 15 دقيقة أو لحد ما تحمر.

ترسة هشة وطعمها زي أفران زمان

رائعة مع الشاي

وبألف هنا وشفا

                                                          خبز المعجنات الطري والهش 

المقادير:

3½ كوب دقيق

1 كوب حليب

½ كوب ماء دافئ

¼ كوب زبدة أو سمنة

2 ملعقة كبيرة سكر

1 ملعقة كبيرة خميرة فورية

¼ ملعقة صغيرة ملح

1 بيضة
 

لدهن الوجه:

صفار بيضة

الطريقة:

في وعاء عميق، اخلطي الدقيق + السكر + الخميرة كويس.

أضيفي الزبدة أو السمنة وقلبي لحد ما تتوزع في الدقيق.

أضيفي البيضة،

وبدأي إضافة الماء الدافئ والحليب بالتدريج مع العجن

لحد ما تحصلي على عجينة طرية وغير لاصقة.

اعجني العجينة كويس حوالي 5 دقائق لحد ما تبقى ناعمة.

غطي العجينة وسيبيها تخمر في مكان دافي

ساعة كاملة أو لحد ما يتضاعف حجمها.

قسمي العجينة حسب الحجم اللي تحبيه،

وبعدين شكليها كور أو أشكال معجنات.

رصي الخبز في صينية مدهونة زيت،

غطيها بفوطة نظيفة وسيبيها تخمر 30 دقيقة تاني.

ادهني وش الخبز بصفار

دخلي الصينية فرن ساخن مسبقًا على 200°

لمدة 12–15 دقيقة أو لحد ما تحمر وتاخد لون دهبي.

                                                خبز بريوش حلو طري وهش زي القطن 

المكونات:

500 مل حليب دافئ

7 جرام خميرة جافة

100 جرام سكر

60 مل زيت

1 ملعقة كبيرة خل

1 ملعقة صغيرة ملح

2 بيضة

750 جرام دقيق

50 جرام زبدة طرية

 

لتلميع البريوش:

1 صفار بيضة

15 مل حليب

20 جرام سمسم

طريقة التحضير:

في وعاء عميق، ضيفي الحليب الدافئ + السكر + الخميرة،

قلبي وغطّي الوعاء وسيبيه 15 دقيقة لحد ما الخميرة تتفاعل.

أضيفي الزيت + الخل + الملح + البيض وقلبي كويس.

ابدأي إضافة الدقيق تدريجيًا مع العجن لحد ما تحصلي على عجينة مرنة ولزجة شوية.

أضيفي مكعبات الزبدة واعجني تاني

(في العجانة أو باليد على الرخامة)

لحد ما تتكون عجينة ناعمة وغير لاصقة.

غطي العجينة وسيبيها ترتاح وتخمر ساعتين في مكان دافي.

بعد التخمير، قسمي العجينة إلى 9 كرات

(حوالي 170 جرام للقطعة)

ورصيهم في صينية مبطنة بورق زبدة.

غطي الصينية بفوطة مطبخ

وسيبي الكرات ترتاح 30 دقيقة.

اخلطي صفار البيض مع الحليب،

ادهني وش البريوش ورشي سمسم.

دخلي الصينية فرن ساخن مسبقًا على 180°

لمدة 20 دقيقة تقريبًا أو لحد ما يحمر الوش.

بريوش طري وهش وطعمه غني وناجح من أول مرة